خلان الاشده
25-04-2007, 06:58
هذ الشاعر عبدالله بن محمد السياري شاعر معاصر الرجل هذا له اولاد ولده الكبير اسمه (خالد)وله اولاد ماشاء الله فيهم الخير الحاصل ان خالد درس وتعلم وتخرج من الجامعه الولد هذا لاشفته الا وجه رجال يملا عينك واذا تكلم ماودك انه يسكت من زين سوالفه والولد هذا فهيم وذكي ماشاء الله عليه وكان هو واجهة البيت ومحبوب واخلاقه حلوه وطيب وشاعر ويميز الكلام ويعرف الرجاجيل ويعرف الاشخاص الي يقابلهم يعطي لكل شخص مقامه الي يستحقه تعلم الولد ودرس وتخرج من الجامعه وتعين واستمر فتره ثم تزوج وقعد عقب الزواج اربعة اشهر وبعدين خذاله بيت بجنب اهله وقام يأثث فيه على شان ينتقل هو وزوجته فيه وكان الله يرحمه الظاهر انه مركب صمام في قلبه وهوصغير وتعبه ذا البيت وتا ثيثه وفي يوم من الايام وهم سمرانين في المجلس هو وابوه وعمانه واخوانه مع العلم ان مجلس ابوه مدهال للرجاجيل قام من المجلس على الساعه تقريبا 12 وقال تصبحون على خير وراح لغرفته شوي يوم صرخ ونادى زوجته قال يامره نادي ابوي وامي قلت وش فيك قال ابي اكلمهم وكن يبين على وجه الارهاق والتعب جاء ابوه وجاءت امه وشفيك عسى خير قال انا تعبان واسمعوا مني انا ابوصيكم وصاه اول شي بطلب منكم طلب مدامكم عندي ان تبحولي وتحللوني وتدعون لي بالخير انا والله مادري عن روحي لاكن بأوصيكم وصاه لاتنسونها (اللي هي زوجته) تعرفون انتم انها على وشك اتجيب ضنا لاكن ان جاني ولد سموه على جدي محمد وان جاني بنت سموها على امي احس ان روحي بتطلع يومنه روعهم بالكلام يوم بردت ارجيله ويديه ويوم طاح عليهم يتلوونه يبون فيه يوم طاح بينهم يوم طلعت روحه وتوفي رحمه الله يبون يركضون للمستشفى قالوا مات يقعدون يصيحون عليه كل الليل الله يدفع البلاء دفن رحمت الله عليه ورزق ببنت وكانوا يدلعونها من غلا ابوها دلع خاص هي بالذات كبرت البنت وصا ر عمرها ثلاث سنين فبعد ثلاث سنين الجرح اللي في كبد ابوه مثل الجرح القاطب الي ماتبين وما تبينه العبره ولا يزيد الا اذا شاف الصغير ه وتذكر ابوها وجاء يوم وشاف الصغيره ولا صبر وهو الي يطلع من البيت ويركب السياره سيارته ونيت مصفح راح ودورله جبل وراح عنده وقام يبكي لين تهللت عيونه من البكاء ويطلع مافي خاطره وعبر عن هذا بهذه الابيات وانا والله ماودي اسمعكم الشي الحزين لاكن هذه من جودة القصيده وجزالتها ونبيكم تدعون له ولجميع الموتى المسلمين بالجنه ان شاء الله الله يغفر للجمبع ويقول
متى مالعباير ضيقت صدري المشحون= ونوت عيني الحرى تنثر عبايرها
ركبت المصفح مبعد الهقوه المامون= وتنزحت بعيون على الصبر عاسرها
تنحرت لي رجم على الوادي المصيون= تعليت به والعين جابت ذخايرها
على فقد (خالد) ونتي ونة المطعون= تكض العيون الدمع والحزن حاشرها
أناأظني أحبا مابقالي وأنا محزون= من الصدمه اللي رب الأرباب خايرها
الاشفت ساره تدرج بينهم بالهون= تعثر و تنهض و أقشرالحظ عاثرها
تنادي ببابا مادرت ذخرها مدفون= تعلق بمن شافت وتنخى عشايرها
تنحيت عنهم وأسبلت عيني المخزون= اطمن وألد بناظري لايناظرها
والاخف حزني صحت ياربعنا تكفون= على الكبد حطوها تطفي سعايرها
هلا مرحبا يأكل عمري ونون النون= ضنا من خياله شايفه في نواظراها
أنا اشم ريحه فيك لوقيل لي مجنون= عيون الخلي لونامت الليل عاذرها
ارجو أن يكون في هذ ه القصيده العبره عن الدنيا الفانيه وتفيد في يقظة القلوب
متى مالعباير ضيقت صدري المشحون= ونوت عيني الحرى تنثر عبايرها
ركبت المصفح مبعد الهقوه المامون= وتنزحت بعيون على الصبر عاسرها
تنحرت لي رجم على الوادي المصيون= تعليت به والعين جابت ذخايرها
على فقد (خالد) ونتي ونة المطعون= تكض العيون الدمع والحزن حاشرها
أناأظني أحبا مابقالي وأنا محزون= من الصدمه اللي رب الأرباب خايرها
الاشفت ساره تدرج بينهم بالهون= تعثر و تنهض و أقشرالحظ عاثرها
تنادي ببابا مادرت ذخرها مدفون= تعلق بمن شافت وتنخى عشايرها
تنحيت عنهم وأسبلت عيني المخزون= اطمن وألد بناظري لايناظرها
والاخف حزني صحت ياربعنا تكفون= على الكبد حطوها تطفي سعايرها
هلا مرحبا يأكل عمري ونون النون= ضنا من خياله شايفه في نواظراها
أنا اشم ريحه فيك لوقيل لي مجنون= عيون الخلي لونامت الليل عاذرها
ارجو أن يكون في هذ ه القصيده العبره عن الدنيا الفانيه وتفيد في يقظة القلوب