ديوان الشاعر / هلال الشمري

[هلال الشمري]

السلام عليكم ورحمة الله وبركاته..

بعد أن ألغيت منهج التسرع ... أضع بين أيديكم هذه القصيده..

أتمنى أن تصل إلى ماكنت أريد..



والله لأجيب القاف...



والله لأجيب القاف مثنى ومربوع=وأنظـم جزيلـه وأتفنن بطيّه
والله لولا الوقت مع لايع اللـوع=لأجيب مزنـن بالرعـود القويَـه
والله لأجيبه مثل ماتبعـد الكـوع=وأقول قولي والموارد زكيّه
يابو فهد دن النجـر دن مسـموع=واللي يجـي أهـلاً هلابه وحيَـه
ومن بعدها زين لنا الكيف من نوع=مـن حـب صنعـاء اللي تجينا نقيَـه
وأحمس لنا بالفن والذوق والطوع=لاحمس حرقانه ولاحمـس نيَـه
ولافاح بنَه حطها جانـب الشـوع=خله دقايـق ليـن تركـد شويَـه
وبعد ذالك زلها بحضـرت ربـوع=بـدلال رسالنـن لفتنـي هديَـه
من صاحبي الي على الطيب مطبوع=أبن الشيوخ مشيخـن بالرضيَـه
ثم أتركه حتى نسايم له تـذوع=به خمسة أنواعٍ مـن الشاذليَـه
ثم صبلي فنجالها سـدر منقـوع=أشقر يشادي شمسنا الشعشعيَـه
أبشربه وأجلي عماسن له أسبوع=ويطيب كيفي واعتلي بالعليّه
وأبجر موالـي على حاني اضلـوع=وأقول وأضلوعـي به النـار حيَـه
ياقلب والله ماني بميـتن جـوع=لاشك أنا أبوصيك وأسمـع وصيَـه
هذا زمانن بـه لكاعات واسبوع=خل النقى ياقلـب خذهـا عطيَـه
وأنهاك أنا ياقلب عن كـل ممنـوع=ممنـوع شرعـن له نتايج رديّه
شاعـر وجبته جيـب حاضر ومدفـوع=وماهمنـي ناسـن تكـذَب عليَـه
السيف مايضرب إذا الرأس مرفوع=والخيل ماتلحق ورجلـي مطيَـه
أبو خلود الحرف يمشيله بطـوع=يشبه سنا البرّاق يشبـه سميَـه

وسلامتكم..

أخوكم/ هلال عزيز الحسيني الشمري..

لكم ودي...

ودمتم بحفظ الرحمن..

[هلال الشمري]

سألني .. أخي العزيز الشاعر / بدر الشمري ..

ماذا تعني ... لي هذه .. الصوره .. فأجبته .. بأبيات متواضعه

أتمنى ... تلقى إستحسانكم ...

http://www.hail1.com/hail/h-pica06.jpg


تعنيلي الصوره حياةٍ هنيه=بين الطعوس وبين شوق البراري
البرق يبرق والرعد له دويه=منظر يشد القلب يم الصاحري
مزنه تهلل خير رب البريه=من صبها رمل الخلا صار جاري
القعر مليانٍ وسد الحويه=وروس الطعوس مردمه بالخباري
وعقب الشهر يمه نشد المطيه=من فوق جيب معممٍ للمساري
وخوت ربعٍ بالهروج العذيه=ماهو مخاوى لابسات الخزاري
بدر ومشعل كاسبين الحميه=وبندر خالي وأبن عمه مشاري
والمنيعي مع فهد والبليه=أخص أبو فهد حشيم الطواري
سبعه وأنا الثامن نجول البريه=بين الخزامى والنفل بالنهاري
ويمن غابت شمسنا عقب الغديه=كلن بطيره ينهمه للحباري
هذا يقول الطير حقي شريه=أليا ضرب كنه ضرب الشباري
وهذا يقول الطير جاني هديه=أليا أرتفع وأنهد مثل السفاري
وهذا يقول الطير حوشت يديه=من ماكره مبغوث لونه حــمــاري
أنا أشهد أنه حر ماشفت زيه=حرن حقيقه ماهو ظن ومواري
هذا يصيد الخرب وهذا سميه=وهذا يصيد الجزل وأيا القماري
وهذا يصيد أرنب ويعلن حصيه=وكلن على ماشاف جاب البشاري
وأليا تجلت شمسنا وغاب ضيه=أذن حدينا مع بزوغ الصفاري
ثم أتجهنا بالصلاة الخشيه=نطلب رضى المعبود مابه نماري
من بعدها نار الخلا زان فيه=نار الخلا ماهي بنار الوجاري
والكيف سواه نشمي بنيه=فنجال بنن مايلن للشقاري
بأيمن النار لحومن طريه=وفي شماله دافنين الجماري
وعقب العشاء والصلاة النهيه=كلن يقول الشعر مأحدن يداري
والروايه فواز حاز العليه=جاب القصص موثّقة بإشتهاري
من عقبها نوم الخلا سم حيه=بين الضماير طعمته له سواري
وقبل الصلاة الأوله بالنبيه=الدار مطلوبه بشوف المهاري
هذا جوابي يارفيقي وميه=ميه قراح وسالم امن الهياري

وسلامتكم ...

أخوكم / هلال عزيز ظاهر الشمري .


.

[هلال الشمري]

السلام عليكم ,, ورحمة الله وبركاته ,,

صباح الخير للجميع , ومساء النور والسرور أيضاً لكم ,,

وأزف لكم ,, هذا النص .. آملاً أن يصل لأذواقكم ,,,


..~| ياحسين |~.. بــقــلــمي |~..





ياحسين سلملي على داعج العيـن=جارن لكم ياحسين حلو الصفاتـي
جارن لكم ياحسين سبب لي البيـن=جارن لكم ياحسين عـذب حياتـي
ياحسين منها ماخذيـت العناويـن=ألا أسمها مريـم برفحـا تباتـي
ياحسين والله لو تصف المزاييـن=من بينهن تزهـى بكـل الحلاتـي
مريم مرام القلب والعين ياحسيـن=مريم مرام الروح ليـن المماتـي
ياحسين لأجله جبت أنا البيت بيتين=ولعيونها ياحسين تنطـق شفاتـي
ياحسين خذها جملتن بين قوسيـن=من غيرها ياحسين يجمع شتاتـي
أم العيون السود والمبسم الزيـن=من غيرها ياحسين تصلح مهاتـي
هي طفلتي ياحسين مالـه لدييـن=غنجا غنوجن بالحـلا والحلاتـي
ريم الفلا ياحسين مالـه شبيهيـن=عطها سلامي وأخبره في حكاتي
عطها كلامي وأخبـره بالمظاميـن=وأبد القصيده بالشجـن ياغناتـي
قله يقول هـلال بعـد السلاميـن=يازيـن لطفـك لاتسبـب فناتـي
أنت الورود اللي سقتني حميميـن=وأنت النسيم اللي حرمني مباتـي
وأنت الصباح اللي به الزين والشين=ياعيد ميـلادي وذكـرى مماتـي
أرجع علي لاتتبـع اللـي مقفيـن=ماغيرك أحدن يعلم اللـي بذاتـي
تذكر صباح السبت مع ليلة إثنيـن=هـذي مواعيـد اللقـاء يامناتـي
وتذكر مكانن يسمرونـه حبيبيـن=وتذكـر هدايـا حبنـا ياغـلاتـي
تكفـى طلبتـك يامرامـي ترديـن=وألا حرامن ماهتني فـي سباتـي
قطع الوصل يازين ماهو من الدين=تكفـى حبيبـي لاتخيـب رجاتـي
ومن بعدها ياحسين عطها العناوين=أما تجـي ياحسيـن وألا وفاتـي
ومن بعد أنا ماموت خذله وصاتين=عطهـا بقايـا دفتـري ياشفاتـي
والثانيه قله وفاتي بسكين=من طعنتك واليوم فات الفواتي
سبت مماتي هجر من هم عزيزين=وأمانتك عطها مكان العزاتي
خله تضمد قلب ذاق الأمرين=خله تروح البيت لوهي فتاتي
قله يقول هلال لا لا تنوحين=عزي هل المقتول هذي وصاتي
مع السلامه والغلا والبساتين=والورد الأحمر والعنا والشقاتي
هذي نهاية شاعرن ذاق مرين=مر الممات ومر غدر البناتي
وسلامتكم ,,,
أخوكم/هلال الشمري

[هلال الشمري]

السلام عليكم .. ورحمة الله وبركاته ..

مساء // صباح الخير ..

للجميع ..

أزف هذه المتواضعه .. أتمنى أن تلقى إستحسانكم ..



,,(,, أمانه ياغلا عمري يـاروحي ياعذب إنسانه,, )



أمانه ياغلا عمري يـاروحي ياعذب إنسانه=أمانـه لاتعذبنـي وأمـانـه لاتناسـانـي
أمانة حبك الوافـي يازهـر الحـب يادانـه=خذني في هواء طيشك وحطن نصفك الثاني
وأبشر في غلا شاعر يثير الشعـر بلسانـه=يحطك لهجت أشعاره ويكتب فيـك ديوانـي
يضمك في دفى صدره يحطك داخل أعيانـه=يعيشك لحظه بلحظه شوي شـوي هيمانـي
يصونك في صبأ عينه مابين الرمش وأجفانه=يضمك في دفى حضنه يغنيلـك بالألحانـي
يعيشك في برائة حب وتبقى رمـز عنوانـه=يناديلك هواء بالي وعشقي وأجمل أوطانـي
أمانة قلبك الغالي تضـم القلـب وأحزانـه=ضمه ياهوى روحي ودمن وسط شريانـي
ضمـه وأتـرك العالـم كلـن راح بفلانـه=بس أنته وأنا حنا وطيف الحـب وأشجانـي
نبقى في بحر حبك وروحي حيـل ولهانـه=ماترضى أبد غيرك يكون المسكـن الهانـي
أمانه ياغلا عمري يـاروحي ياعذب إنسانه=أمانـه لاتعذبنـي وأمـانـه لا تناسـانـي
وسلامة قلوبكم ..

أخوكم // هلال عزيز الشمري ..

[هلال الشمري]

السلام عليكم ورحمة الله وبركاته..

صباح الخير ..//مساء الخير ..

للجميع ..

لا أعلم لكن بدون مقدمات .. أهتاض قلبي

عندما قرأة نص الشاعر .. القدير // فيصل اللويش ..

وكتبت قائلاً ..


..( ضحوبنا عيال الخنا والخنازير )..





مهما كتبنا بالقلم وانتخينا=مادامنا هلون ما يمكن يصير
في بعضنا قمنا نحز وكلينا=في بعضنا وانقول هذي مقادير
واللي مسكنا وابتدأ في يدينا=يكتب حروف الذل عمٍ و تحذير
هو همّنا مليون وألا مشينا=وألا سهم يرّث علينا مخاسير
نبي نعز الدين واحنا هفينا=نبي نحرر حرمة البيت تحرير
نكتب سؤال ونحتري من يجينا=وانجاوب اللي كاتبينه بتكرير
نرقى ونرقى ولكن رقينا=عكس الذي قاموا فيه المناعير
أول نهز الغرب بالشايتينا=وانهز ماصفوا صفوف وطوابير
واليوم في غزه.. وفاضوا علينا=ضحوبنا عيال الخنا والخنازير
وأنا أطلب المعبود وأرفع يمينا=عساه يرحم ضعفنا بالتباشير
ربي إليكَ اليوم ربي لجينا=ياباعث محمد ومرسله بالخير
يامخرجٍ ذا النون لطفك رجينا=ياجايرن عبدك من النار يامجير
يامرجعن يوسف إليكَ إشتكينا=يامشتكانا يامدير الأعاصير
إليكَ نشكوا ضعفنا يامعينا=ياصاعق الإنسان ياجامع الطير
هذا رجاي ورددوا يالسامعينا=آمين وآمين وآمين يامجير

وسلامتكم ..

أخوكم // هلال عزيز الشمري .


.

[هلال الشمري]

بعد غياب ..
أضع بين أيديكم نص متواضع أتمنى أن يرقى لأذواقكم ..


ذاب الـــجــلــيــد




وش به مزاجي غير كل المزاجات=فيه الكدر والهم .. فيه الغبينه
أبكي واكضم دمعي اليوم بإسكات=وأقول مستانس وحالي حزينه
ايا وجودي وجد من صاحبه مات=في حادثٍ يرعب سكون السكينه
حضنه في حضنه ودمه خبارات=ولحظة حضنه الموت جاه بيدينه
صاح وبكى واردف مع الدمع دمعات=دنق عليه بحزن .. قبل جبينه
أو وجد من صاحت بليل المتاهات=ليلة عيد الفطر .. ربي تعينه
جاه الخبر مفجوع بأغلا الملذات=جاه الخبر بأنه توفى جنينه
صاحت وطاحت بين كل الممرات=صاحات من الويلات صيحة غبينه
أو وجد من جاه الخبر بالرسالات=في نصها ماجور بنتك أمينه
في غربته ضاقت عليه الولايات=مات الأمل مات الفرح مع حنينه
هلت دموعه قدم كل السفارات=ماله أمل رجعه بغير السفينه
أبحر ولا يدري وش اللي بعد آت=مايدري أن الموج هاج بكمينه
تحطمت كل المراكب بالأفات=وراحت به الأمواج من دون عينه
نجّاه ربي لا تجيه المنيّات=وشالته مدات البحر للمدينه
ثم اتهمه الناس ظلمٍ مع إثبات=بأن المليك إغتيل وانته طعينه
حكم عليه الموت تعزير بآيات=طبق عليه الحكم وافضى كنينه
ياناس قولولي علام المزاجات=عكس المزاج اللي مزاجي رهينه
أعيش بأحزاني وأسج بعلامات=وارسل واعيد اليوم ويني ووينه
ياليت أنا آسف تعيد الدقيقات=والا يجي موتي وأنا أبقى مدينه
ياناس صدري به من الهم رايات=واجيوش واحزاب وحصانه متينه
تكفى وتكفى هزت أقوى الحصانات=والعمر واحد والثواني ثمينه
مجبور أنا أخفي ماخفى بالخفيات=واضحك وأنا أبكي من قرين وقرينه
وآخر كلامي في حزين العبارات=هذي وصيّه من اهلال لضنينه
البارحه جاني خبر بالمنامات=أني غرقت أبساحلن فيه طينه
أولت تفسيره وجتني جوابات=والله تبكي من عرف وش دفينه
لكن إذا جاك الخبر و الوداعات=وذاب الجليد وطاح تمثال دينه
أرجوك تدعي لي بركعٍ وسجدات=ولا مر طيفي فكر أنك مدينه
ولا قالوا أسمي بالتعازي ورحمات=أصفق شمالك في محاسن يمينه
أذرف دموع الصمت بالصمت وآهات=وفي غرفتك هز الحصون الرزينه
وأن شفت مفرق ديرتي في متاهات=وقف.. وقل جار الزمن في سنينه
وأن جيت ..للموقع .. وشعري ..والأبيات=تكفى ترد .. وتذكرن في حسينه
وأكتب بأنه يسهر الليل مابات =ياما تعذر واضحكن في كنينه
ودي وودي لو تطول المسافات=واخبرك عن.. موتر.. وعزم.. و مكينه
واضحكك في قصتي يوم الأزمات=وارويلك الطبخه وخبز العجينه
لكن ماباقي من العمر مافات=ماباقي الا من شتاتي ونينه
أمنتك الله لا توفيت لي حات=خلاص أنا راحل... وكلي ضغينه
مع السلامه .. والفرح .. والتحيات=مع الهنا .. والعز ....وأشياء تبينه
وآخر طلب .. موجود بآخر خطابات=..( مسموح )..(كلمه)..(طالبك).. تنطقينه

وسلامتكم
هلال الشمري

[هلال الشمري]

نصيحة .. كيبورد




احذرك يابنت الاشراف واحذرك=واحذرك واحذرك يابنت حذراك

حذراك عن شخصٍ يحبك ويخبرك=بأنك ملاكه .... ( كاذبٍ لا يتوطاك )

خنتي عهد عودٍ توفى وفكرك=تاجٍ على راسه وضنّه تعداك

أن ضاقة الدنيا حبيبك تعذرك=حب الوناسه لعب راعيه أفاك

إذا بغاله حاجةٍ منك وقرك=وأن صدت الدنيا تعذر وخلاك

هذي نصيحة شاعرٍ كان يشكرك=مازال ينصح .. لا تكشّف خفياك


وسلامتكم /

[هلال الشمري]

جو حايل أبيات







البارحه جو حايل خيالي=فيها النفوس الضايقه تستريح

حايل دياري مقاطين بالي=فيها هواء نفسي وجوّه مليح

أعشق نفوده وسمر الجبالي=وأعشق تلاعه ومسهل السيح

الله ياسالت شعوف المفالي=عقب المطر بنّ عشبه مع الشيح

لحظه..! تنسي غاليٍ ذكر غالي=به النفوس العاشقه له مشافيح

[هلال الشمري]

حينما يتم نقل نص يحاكي المشاعر وفيض مالبنفس
تجد نفسك لا إرادياً تعبر عن بوحك الخاص ناهج نهج ما أثار القريحه لديك
فـ حينما أطللت على قسم المنقول في موقع ما وجدت 7 أبيات منقوله ناقلها الأخ الامير
فأخذتني . حتى قلت :


!! عظمي كسير !!



يامير واللي نزل الناس والطور=أن الهواء رحله وحنا ركايب
كم غررت دنياك هايم ومثبور=وكم سببت يامير دمع ومصايب
هذا حبيب وهايم الحب مكسور=وهذا بكى مجدول زين الذوايب
هذا كتب للوقت تسلم ومشكور=وهذا لعن ليله مع الصبح نايب
وأنا على ماقيل يامير مجبور=عظمي كسير وجابر العظم عايب
عزلت من دنياي وابنطر الدور=عزلت أنا يامير عزلت تايب
دامه تركني راغب الشئ معذور=عسى الولي يكفيه لفح اللهايب
ماني على مايطلب الزين مغرور=لوهو طلب روحي عطيته وهايب
مقدور ياقلبي على الصبر مقدور=لاتنكسر ياقلب / خاطره طايب
اليا سألك الحال/ فالحال مستور=احذر تبين دمعة الروح سايب
ومهما حصل فالحب لايمكن يبور=باقي على عهدي لو الرأس شايب
عندي أمل ترجع لو بعالم الحور=هذا الأمل طاهر بطهر السحايب
فعسى الذي بأمره بزغ شاعق النور=يجمع على ود المحبه قرايب
هذا الذي قلته وأنا اليوم مجمور=من حرةٍ بالقلب سقت الكتايب
عنوانها ماني على الناس مجبور=والله لنا يابنت والكذب خايب
يشهد علي الله والحب مسبور=بين الحنايا داخل الروح ذايب
لأجله بأقول أبحور وآعانق ابحور=دام المحبه ماتفيد الحبايب

ودمتم بود

[هلال الشمري]

السلام عليكم ورحمة الله وبركاته

أخواني الاعزاء .. في موقع آخر ,, هناك كآتب أسمه

أبن طي ,, أورد قصه عن الشيخ الشاعر الفارس الكريم : مغير ابن غازي

فأحببت أن أرد عليه بالمتصفح ولم أعلم إلا وأنا كاتب هذه الابيات

.. آملاً أن تصل ..

رغم أنني أعلم أن الاحرف لاتوفي والكلمات لاتسعف إلا أنني أحببت التعبير.

إليكم النص:


الشيخ : مغير بن غازي ...




يقول ابن غانم وقوله دليلي=مثل الذهب محبوك ياحابك النير

عنده رزين القاف وايضا ثقيلي=من خلقته ماقال../ من دون تبرير

واليوم جتله كالسحاب المخيلي=يوم أبن طي(ن) ذكر طاري امغير

شاش وتهيض جاش وأبدأ جزيلي=دامك ذكرت الشيخ../ لايمكن يصير

لازم نخط القاف../ قاف(ن) يهيلي=نآخذبها صولات ../ ونخالف السير

نسل الشيوخ معربين السليلي=مفراص صلب(ن) للفعول المعاسير

الصيرمي يبقى لجيل(ن) وجيلي=نسله شيوخ(ن) يكرومون الخطاطير

يبقى على الطولات طايل طويلي=شيخ(ن) له بقلبي مكانه وتوقير

شجاع / فارس ../ مايقول أستحيلي=شاعر يسوق القاف سوق المعاصير

اغدوق الكرم بأيمان مثله تسيلي=تصافق الغدران والخير به غير

ياكم ذبح للضيف حشو(ن) وحيلي=وكم أبو صعل(ن) من سيفه يزير

اللي ذبح بالسيف جمع(ن) جليلي=من ضرب سيفه يشبِع الذيب والطير

ماهو من اللي بالمواقف ذليلي=شيخ(ن) ولد شيخ(ن) يقود الطوابير

ولاهو من اللي بالشدايد بخيلي=هداج تيماء كالعيون الهدادير

كريم سبلا بالزمان المحيلي=ياكم فرجها بالفعل والدنانير

سفينة البيدى يشيل الثقيلي=هو عز ربعه بالليال المدابير

جعل الولي ياقاه شر الصليلي=في جنة الفردوس يجزيه بالخير

ياجعل قبره بالرغيد الظليلي=في روضة الفردوس عدنن مخاضير

قدم النبي عند الصحابه خليلي=بجاه الذي يرحم اعباد ويجير

ومثل ماقالوا هل العلم قيلي=مامات من ورث وجيه(ن) مسافير

ورّث لنا شيوخ(ن) بعز(ن) جليلي=شيوخ(ن) تشيخ../ معربه بالمواكير

صغيرهم بالعز عز(ن) يكيلي=وكبيرهم ماقال .. هذي مخاسير

بيت الكرم والطيب يومه قليلي=يومه بخيله شايخين(ن) مناعير

واليوم ياهل اليوم هذا دليلي=في مدح (أبن غازي) نسوق المظاهير

يمّه نسوق القاف يمّه دخيلي=يلفي عليهم بالغلا والتباشير

يحمل سلام(ن) كالذهب ياعميلي=أحلا من الحلوه ودر المباكير

للي لهم كل المكارم تميلي=اللي لهم بالقلب حشمه وتقدير

خوالي اللي يسعدون النزيلي=في قربهم يلقى النفوس المصاغير

مايذبحون الهس والا الهزيلي=دايم على العليا جزالن مشاتير

في مدحهم نسرج مع الهجن خيلي=أهل النجور المرزمه والمباهير

وقت المسالم.. ينفقون الجميلي=انفوسهم مثل الرياض المزاهير

وعلى العدو سم(ن) وسم(ن) غليلي=يردون نفسه بالسيوف الشواطير

أشبال غابن بالزمان المشيلي=في مدحهم تعجز حروف ومحابير

لو قلت في مدحي كثيرن نفيلي=مايوفي بحسب الفعل والتقادير

هذا الذي عندي وهذا حصيلي=يومه تهيض خاطري يالشواعير

وصلاة ربي عد رمل(ن) يهيلي=على النبي الهاشمي بالتقارير




وسلامتكم



أخوكم ، هلال الشمري..

[هلال الشمري]

السلام عليكم ورحمة الله وبركاته
مساء .. / صباح .. الخير للجميع ..
حينما تقف عقارب الزمن لبرهه لتأخذ عزيز ولتفجع عزيز ..
تحير الجمل . وتتلاشى الأحرف .
لتتمتم بإنا لله وإنا إليه راجعون ..
تقول أم أفنان :


صـوت أم أفنان وصدى صوتي



يالصيت جيبي دمع عينك و هليه=هلي دموعك دم و ارهي صبيبه
على الذي بالناس ما أحدن يساويه=على الحبيب اللي يسلي حبيبه
ياعاذلين القلب كافيه ما فيه=أمشي كما السرحان و أقنب قنيبه
واقلبي اللي زايد الهم طاويه=لا والله ألا فر بالراس شيبه
مابي بلى يوم إن زولي يباريه=و أثر المنايا من حبيبي قريبه
يوم إن زوله عند عيني و أداريه=و أنا حياتي له معاني عجيبه
أنفض تراب البر برا مخابيه=و أحط دهن العود في وسط جيبه
أمشط شعر راسه و أغسل مواطيه=و أكوي له البدله و أشمر و أجيبه
من دون ما يآمر نخدمه و نغليه=شيء من الله حط قلبي نصيبه
و إليا زعل حاولت بالشعر أراضيه=عقدة حجاحه عندي أعظم مصيبه
و إليا ضحك طلبت ربي يخليه=ظل لنا دون البشر نهتني به
أقفى و خلاني و لا لي مشاريه=الموت حق و كل حي يصيبه
رميت شالن ريحة المسك تزهيه=و بدلتها بالسدر تملأ الذويبه
من عقب ماشوقه يسوقه و يدنيه=و من الحفر دقات قلبه تجيبه
يومه يحاكيني بذوقن و أحاكيه=و صوته شفاء همي و صوتي طبيبه
ياقال "حبي" قلت "تآمر" و "لبيه"=و ياقال"أبوي"أقول "للحل" طيبه
كلمة "هلا" رده ليا قمت أناديه=أنشهد إن الحال عقبه صعيبه
غشام أبيه و غير غشام ما أبيه=له فرجتن في وسط قلبي غريبه
حتى المجوسي عقب ما مات يبكيه=وشلون عيني ما تفيض سريبه
عزي لحال أمه ليا حل طاريه=تشوف زوله عند حروة قليبه
عزي لقلبه يا تفطن لماضيه=ينقز على متنه و يرضع حليبه
و عزي لفنوني عقب شرة يديه=تقول بابا مالقت من يجيبه
و عزي لقلبي يا تذكر حسانيه=أقنب كما تقنب من الجرح ذيبه
و عزي لقلبن بيح الموت خافيه=و ما جابت الورقا يون و يجيبه
طيفه يكلمني بنومي و أناجيه=يزورني طيفه و لا أحدن دري به
و من لامني ياجعل ربه يجافيه=الله وكيل الخلق و الله حسيبه
طبع الزمن قاسي و لا دام حاليه=و من يامن الدنيا لزوم تغديبه
من يامن الدنيا تخونه و تغديه=تفرح ليا سمعت بكاه و نحيبه
كم عاقلن وقته من الغبن يسقيه=و كم جاهلن يضحك و لا صك جيبه
ياهيه ياللي حلو الأيام تلهيه=لا تأمن الدنيا و يغريك طيبه
دنيا رديه سالي البال تشويه=ما هي ببنتن للطنايا عريبه
و لا هي ببنت للرشيد و بنيخه=و لا أظن أبوها من سلايل عتيبه
دنيا دنيه سلم الأنذال تخفيه=وجهه كما وجه النور من صليبه
الله مفوضها و رايه تمشيه=لا جت بطيب و لاتجي بالغصيبه
سبعة سنينن صافين لي مصافيه=مار الليالي ما تعلم بغيبه
ما كنت أحسب الموت هالسرع ناويه=أنشهد إن جروح قلبي عطيبه
و يالله تسامحني على فجعتي فيه=و من لامني لابد ياخذ نصيبه
أذكر صدى صوته و لاني بناسيه=ضاق الفضاء و أفراج ربي قريبه
يا حر قلبي من مجاهد بلاويه=غصبن على روحي نصيبه رضيبه
و يالله عسى في جنة الخلد تحييه=و تجبر عزى قلبي و تطفي لهيبه

إلى هنا ليأتيني النص ويزعزع سكون الذات يا أم أفنان .
فقلت لها .. رغم علمي بأنني لن أصل لتلك العاطفه .. أيضاً لم أسيطر على العاطفه
فا :


من وين أببدى والمبادي مباديه=والنجم غاب وغاب ضايح رقيبه
حتى القوافي من صدى الصيت ترثيه=والليل واسلوم العرب والنجيبه
والخيل , والبيدى .. وجمعة غواليه=والطيب , والخوه , وحكي نحكيبه
أجا بكاه وليت سلمى تواسيه=لاشك سلمى من وفاته صويبه
وضلع الرعيله ينتهض من طواريه=وسنجار من عقبه حواله كأيبه
والبر والرحله وموحش ضواريه=والطير , ورجالٍ , عقوله لبيبه
أهب ياوقت الفجايع واهبيه=واهب ياخطٍ يخون بصحيبه
من غيبته ماعاد بالوقت تشريه=من غيبته بيض النوايا مهيبه
من غيبته موجي تعدى مراسيه=كن المواني تنتفض من نحيبه
وكن الحفر صاحت وضمت محانيه=وكن الشوارع عقب موته مريبه
حتى الخيال اللي تعدى محاريه=يرزم عليه ولا تبين صبيبه
أبكيه أنا وأنتي وربعٍ تماشيه=وأفنان والمذن وجمع الكتيبه
والود , والبدله , وأمٍ تحاتيه=وأخوان غشام , ومجوسي دريبه
وأخوال غشام وعمامه واهاليه=حقٍ وواجب من قريب لقريبه
من لامنا يالصيت يخسر عوافيه=عسى الولي يخزيه يوم الطليبه
أبكي عليه وكل ماحل طاريه=قلبي طواه اليأس طوي القليبه
ويالصيت أبكشف عن خليلك خوافيه=أبكتب النبذه وأدون واجيبه
سبحان ربٍ معطي الطيب معطيه=كآمل وللمولى كمالٍ يطيبه
ماعمر ضاق الصدر من هرجته ليه؟=لأنه على غير الكرم مايجيبه
أخلاق من خلق الحكيمين تحليه=أيضا ولاله بالمقفين غيبه
هذا وأنا أدري بالنبذ مانوفيه=أدري وعيني فوق خدي سريبه
لو ينحرب نزاع الارواح ناتيه=ناتيه بجموعٍ تطيش بحريبه
نموت من دونه والاعمار تفديه=ونشبها يالصيت شب العسيبه
عنّه فلا ننكف والاقدار تهويه=أما نروح أفداه والا نجيبه
لاشك مافاد القلم يوم نسميه=والنوح وادموع الفنون وسكيبه
هذا القدر والله على الخلق مبديه=حتى رسول الله توفى بطيبه
الموت حق وحقنا مانخليه=فرضٍ علينا لو بغينا نسيبه
يالصيت عندي وعندك بواديه=عصبٍ علينا لو بدينا نعيبه
حكم الذي كل المخاليق ترجيه=الواحد اللي غيب الإنسان غيبه
عساه يرحم من خذا الموت غاليه=عساه يرحم من بكينا مغيبه
عسى الولي يغفر ويمحي خطاويه=يكتب له الجنّه بمسكه وطيبه
يالصيت دامي حي فالضيم خليه=الروح ترخص والمعاني وجيبه
بالمال والنفس وحلا الجاه نهديه=سلملنا يالصيت ماهي غريبه
مابين جفن العين والعين شوفيه=مكانكن يالصيت هيبه وهيبه
هذا وأنا أدري مانسد بمكانيه=كيف القمر ياغاب يسطع رقيبه
دنيا تموج وغافل الناس تلفيه=كم واحدٍ حطت عليه بركيبه
إن قبلت تسعد وترخي بإياديه=وإن كشرت ياكنها فاه ذيبه
هذا وصلوا عد فجعت بلاويه=وأعداد ما شام الخيال لشعيبه
وأعداد ماالمذنب حلا الذنب يغريه=وأعداد مالمحسن حسانيه ريبه
على الذي كل المخاليق تبكيه=عليه صلوا يوم حل ابكتيبه


فأدعوا .. لأخي غشام بالرحمه والمغفره ..

[هلال الشمري]

السلام عليكم ورحمة الله وبركاته

عذراً عن الغياب ..
نص قصير العمر أتمنى أن يروق لكم


الجفول ؟




يمكن يصير الصمت للموقف حلول=ويمكن يزيد الصمت نبرة من جفاي

ويمكن يكون الود سامح لو نقـول=ويمكن يطيح الدمع زايد من عنـاي

ويمكن يغيب النجم يخضع للأفـول=ويمكن يضيع الحلم مايطلب هـداي

ويمكن يعيش الحب قابل للعـدول=ويمكن يروح الصوت مايسمع نداي

لكـن غلانـا يامرامـي مايـزول=يبقى رهين الروح ساكن في حشاي

يبقى حياتي في حياتي لـو يطـول=يبقى سنيني ياسنيـنٍ مـن عطـاي

وابقى سجينه في رضاتي والقبـول=ويبقى سجيني في ضلوعي يامنـاي

والرب يُعرف عارفينـه بالعقـول=والورد يذبل لافقد رشّـت يـداي

أبسألـك بالله عـالـم مانـقـول=الواحد اللي كاشفٍ ساير خفـاي

وش لي بقلبك من مكانه يالجفـول؟=وش لي بقلبك من مكانه ياغلاي ؟

تدرين لأجلك سار دمعي للنزول؟=تدرين لأجلك دمعتي تطلب رضاي؟

تدرين لأجلك عايشٍ وقت الخمول؟=تدرين لأجلك ثمّ لأجلك يارجاي؟

حرام جفني من دموعي بـه محـول=حرام صوتي يحتمـل نبـرة بكـاي

والله أحبّك والمحبـه لـه فصـول=وأنا فصوله في ربيعـه فـي شتـاي

وأنا فصوله في خريفـه والوصـول=وأنا صيوفه في صفوفـه يافـداي

هذا جوابي واسمحيلي لـو يطـول=تبقى نجومك ساطعـه تملـى سمـاي

تبقى غلاتك ساحره حتّى الذهـول=وابقى رهين الـود.. ياريمـة فـلاي
وسلامتكم

[هلال الشمري]

السلام عليكم ورحمة الله وبركاته

مساء الخير للجميع .

نص حديث الولاده أتمنى أن يرتقي لأسماعكم .


أنا خلقت وداخلي صوت رنان=يطرب مواليف الحياة بهديله






ليه المحبه تنكتب دون عنوان=وليه الحبايب مايبيتون ليله

وليه الزمن مايجمع قلوب خلان=وليه الحياة اتصير جداً بخيله

وليه المحبه تخلق بوسط بركان=وليه الرماد يصير ناتج حصيله

وليه اعيش الحب والحب كتمان=يقتل سراب الروح يومن يجيله

أنا خلقت وداخلي صوت رنان=يطرب مواليف الحياة بهديله

أنا طبيعي مؤمن وداخل انسان=عنده مشاعر والمشاعر دليله

أنا من الحاضر وأنا كان ماكان=اضوي ظلام الليل وأنا الفتيله

عشت المحبه بالمحبه لي ازمان=وشفت الهواء مجروح حاله عليله

وشفت المحبه ذل من دون الالوان=وأن التواصل لون يرفض بديله

وشفت المحبه طير جازوه بإحسان=أن كان خل(ن) به يلاقي خليله

أيه المحبه يأهلها شانها شان=تشبه ظلام الليل وانت الدليله

وأنا هواي اجروح وامرار واحزان=وانكار في ذاتي وسم ومليله

لاعادلي في عالم الحب شطئان=ولا عدت أنا الغالي ولالي حليله

ربي خلقني للمواليف ربان=واصبحت في عرض البحر وارتكيله

هي عيشتي حرمان بأكناف حرمان=أفاخت البراق وارجع واخيله

ما عادلي في عالم الملك تيجان=ولا عدت أنا المالك ولالي طويله

خلوني أحيا دون ذكرى وديوان=دام الأمل معدوم بأسيوف جيله

قبلي سقط يالايمن قصر برزان=وقبلي بعد هدوا شموخ الرعيله

ناس(ن) لها في عالم الحب ميدان=مثل السراب تلوح وقت المقيله

قلته وأنا في عالم الحب حيران=يقطع خليل(ن) مايواصل خليله










وسلامتكم ..



هلال الشمري

[هلال الشمري]

السلام عليكم ورحمة الله وبركاته

تأسرنا الاحرف أحياناً وتأخذنا الاصوات إلى أن نبوح

إليكم خربشه كيبورديه

.

:

/





حويت الصبر واهمومي وقلبٍ داخلي بردان=ومل الصبر من صبري وطحت وبان خافيها

زفرت الحب وانفاسه شهقت لداخلي نيران=ضعت بعالم الوحده بقيت أرقب مرافيها

أنا الحاير بطيّ الوقت أنا الصامد بعزم إنسان=أنا العايش بدون الحاف روحي من يدفيها

أعاند وقتي القاسي وأقول أني أنا الغلطان=شفني للأمل بذره وبانت من سوافيها

أقوم الليل في فكره وأفكر كم بها مرضان=أفكر كم بها خاشع يدعي يالله اعفيها

أفكر كم بها نايم وأفكر كم بها سهران=وادعي يالله العالم تبين لي خوافيها

شفت بهالزمن غربه وشفت بداخلي طوفان=وشفت أن البشر تكره وتغلي من يجافيها

وشفت أن القمر يسطع بليله مابها خلان=وشفت أن الهواء لعبه سراب الصيف يحفيها

سلام الله من الضايع من الهايم من الغرقان=سلام ويقتفيه الهم بدنيا من يصافيها

بدنيا ماتبي قربي بليلٍ مايبي حيران=سلام الله من الخاطر سلام الله ويكفيها




هلال الشمري

[هلال الشمري]

السلام عليكم ورحمة الله وبركاته
نعتذر عن الغياب .
ونصافحكم .
بــ أبيات جديده . أن شاء الله تحوز على رضاكم ..

.

:

/






حسبي عليك الله علامك خذيتي=من عقب مانا في حياتك وتغلين!

وين الغلا والحب ؟ والا سهيتي!=وين الحلوم اللي عليها تنامين؟

وين الكتاب اللي بنومي قريتي؟=وين الرسايل ... والصور ... والدواوين؟

وين القصيد اللي بقوله بكيتي؟=وين الحبيب اللي بحبّه تموتين ؟

وين الزواج وخطته يا حكيتي؟=كان الطلب شهر العسل يم برلين!

وين الزهور اللي بدارك سقيتي!؟=(هذي زهور الحب واهلال معطين!!)

وين السهر والود واحروف بيتي=اللي عليها باللحن لي تغنين !

كل الكلام اللي ذكرته نسيتي !=يعني خلاص اليوم! نبقى بعيدين!

يعني نعيش بحلم وانتي دريتي =بأن المصير أفراق لوعه وجرحين!

يعني خلاص ؟ بعالمي ماطريتي*=ما عاد ينفع لو لفيتي تصيحين!!

عسى حياتك مثل مأنتي بغيتي=وانا على المولى نصيبي ويكفين!

كم رجيت القرب وانتي خطيتي=خاب الرجاء .. يامترفه لاتقولين !

مع السلامه من غلاي انتهيتي=روحي بدربك يالغلا لاتمرين!








:



.



/



وسلامتكم



هلال الشمري

[هلال الشمري]

السلام عليكم ورحمة الله وبركاته
صباح الخير / ومساء الخير .
أبيات أرتجاليه لموقف . أتمنى ان تصل إلى أذواقكم .
رغم أنني مهما كتبت فالأدب برمته لايفي اولاد علي الدغيرات .
حنا عيال العود سبعة ولّدي .. ..



ياصاحبي لاتحسب حساب البعيد=خلّك قريّب لا تبعّد يابعدي
دام انا وانته على ذاك الجريد=وش دخل المثبور وش جاب الردي
احزم حزامك وحارب من جديد=لا ترجع لهزل السوالف مجهدي
خلك معي والله يفعل مايريد=أمّا تجي والا عساها تبعدي
وارثين الطيب من عصرٍ تليد=حنا عيال العود سبعة ولّدي
حنا الفخر ذاك الشرف بحرٍ مديد=ايه استخيلي ياقصيده وارعدي
دام المعاني في كفوفي كالعبيد=شوشي عليهم واكتبيلي وانشدي
سبع الجموع اليا تناخوا من بعيد=تكْسِرْ القوّه بقلب المعتدي
من مثلهم ياعزوتي رايه سديد؟=من مثلهم لامدها جاب الشردي؟
من مثلهم لا شاش في شوشه شديد=تخضعله خشوم الجبال العنّدي؟
من مثلهم لاشيّبت بقعاء الوليد =من جودهم عشّوا ذيابٍ عوّدي؟
من مثلهم لاضاقة فجاج العنيد=هم عزوت اللي ينتصيهم معتدي؟
من مثلهم لاهجّت جموع العضيد=يثنون دون الدار ماهم صرّدي؟
من مثلهم لاقال قايل له قصيد=بسبع الالسن يحضرونه فردي؟
من مثلهم لاصاح يرتاب البليد=غصبٍ عليه يزوغ هج وسنّدي؟
من مثلهم له ضربةٍ قصّت حديد=كن المنايا من يديهم تبتدي؟
من مثلهم شاد دوله للرشيد؟=يشهد على ذالك عبيدٍ سيدي
من مثلهم ياناس والله مايسيد؟=سادوا وقادوا كل جمع مجنّدي
فيهم بديت القول وانهيت البريد=عجزت لأكمل والقصيد مقيّدي
يقول عنهم يالجنوبي مانحيد=بس القصايد قدم ربعك تسجدي
هم للعدو ناره وللزابن جليد=هم اليماني لاتعلّى والجدي
هم سور حايل من زرعها والحصيد=ثقل شمّر والقصيد مشيدي
هم الفخر ذاك الشرف بحرٍ مديد=وهم عيال العود سبعة ولّدي


وسلامتكم
هلال الشمري

[هلال الشمري]

السلام عليكم ورحمة الله وبركاته
مساء/صباح .. الخير للجميع

السلام عليكم ورحمة الله وبركاته
مساء/صباح .. الخير للجميع

التوبه ؟!!!

استغفر الله قبل ماموت واتوب=عساه يستر مابدا من عيوبي
جلّا جلاله عالمن كل مندوب=سبحانه اللي له شكيت الذنوبي
يالله ياغالب ولانته بمغلوب=يامفرج الشدات يسّر دروبي
ياواحدن تخشع وتخضع لك اقلوب=جيتك وانا يالله بوقت امحسوبي
راجيك عفوك وانت لي خير مطلوب=يوم الخلايق كل ابوهم هزوبي
ياعايدن عقب الضرر صحّة ايوب=لك ولا لغيرك نخاف وننوبي
دام العمر لحظه من الوقت منهوب=والناس لاقفّت ركابي حكوبي
يالله عسى مايخذن كل دالوب=في دورة ايام الزمان اللعوبي
ويالله ثبتني على الدين والصوب=لازاغت اقلوب العباد ومشوبي
واعلن مماتي للملا وسط مكتوب=وعقب الغسل بعد الصلاة اسرعوبي
ونزلت في قبري وحطولي الطوب=وكلن شرع بالدفن يوم انزلوبي
ماغير لطفك يارجا كل مكروب=ارجيك انا مقصّر بكل الوجوبي
اطلبك عفوك ياغدا الفكر مرعوب=ثبت فؤادي يااسألوا واوغلوبي
يارب انا عبدك واقرّيت بذنوب=قبل الممات وقبل فجر الغروبي
ياواحدن تخشع وتخضع لك اقلوب=استغفرك يالله واغفر ذنوبي


هلال الشمري